yr ail fideo

Dw i'n teimlo'n llawer gwell heddiw. (Dw i'n dal i oeri fy mhen efo rhew.) Gan ei bod hi'n fis ers i mi wneud fideo ohona' i'n siarad Eidaleg, mi wnes i un arall sydyn gynnau bach. Wedi gweld y ddau (efo poen) dw i braidd yn siomedig peidio gweld gwelliant sylweddol. Wrth gwrs na fydd hyn yn fy stopio i rhag dysgu Eidaleg. Efallai dylwn i wneud fideo bob tri mis yn hytrach na bob mis.

damwain

Mae'r iris yn dal i flodeuo. Dw i mor hapus i weld blodau newydd bob bore. Dyma wneud yn siŵr i'w dyfrio nhw bob dydd. Yn anffodus ces i ddamwain yn yr ardd y bore 'ma wrth i mi wneud y gwaith. Mi wnes i faglu dros y bibell a tharo fy mhen erbyn y wal. Clywais sŵn ofnadwy fel pe bai'r pen wedi cael ei dorri! Ond diolch i Dduw, dw i'n iawn. Mae rhew ar fy mhen drwy'r dydd.

iris!

Maen nhw newydd flodeuo! Roeddwn i'n sbïo drwy ffenestr y gegin ar y gwely iris am ddyddiau. Pan es i at y gegin y bore 'ma, y peth cyntaf a wnes i oedd gweld y gwely iris, a dyma nhw - blodau cyntaf hardd yn disgleirio yn yr heulwen foreol. Mae yna lawer mwy o flagur eleni. (Dw i'n credu'n siŵr mai canlyniad fy ngofal drostyn nhw ydy hyn!) 

peli cig

Coginiais i beli cig Eidalaidd yn ôl rysáit Nadia neithiwr. Roedden nhw'n anhygoel o flasus ac roedd y teulu'n hapus iawn. (Do, mi wnes i ferwino caws Parmesan fy hun.) Ffrio a wnes i ar badell ffrio yn hytrach na'u rhostio nhw yn y popty oherwydd bod hi'n boeth ddoe a doeddwn i ddim eisiau codi tymheredd y gegin. (Mae'n ddrwg gen i, Nadia!) Merch ddoniol ydy hi. Dw i'n cael hwyl gwrando arni hi er bod hi'n siarad Saesneg yn unig yn y fideos.

yn lyon

Cyrhaeddodd fy merch yn ddiogel. Dwedodd fod y bobl yn Lyon yn anhygoel o glên. Pryd bynnag agorodd hi fap, daeth rhywun i'w helpu. Mae hi'n synnu'n clywed Ffrangeg ym mhob man ac yn gweld arwyddion yn Ffrangeg (er mai naturiol ydy hynny!)

i ffrainc

Mae fy ail ferch newydd adael y dref fach yn yr Eidal wedi treulio dau fis a hanner ymysg cynifer o bobl glên. Mae hi'n teithio ar y bws ar hyn o bryd a chyrraedd rhywle yn Ne Ffrainc am 5:30 yn y bore. Bydd hi'n cyfarfod efo ffrindiau o Oklahoma sydd yn digwydd bod ar eu gwyliau yno rŵan a threulio dyddiau efo'i gilydd. Am antur!

termae romae 2

Mae'r ffilm newydd sbon hon newydd gael ei rhyddhau yn Japan. Y tro 'ma, dylai Lucius, y prif gymeriad o Rufain hynafol, adeiladu bath enfawr tu ôl Colosseo ar gyfer y gladiatoriaid. Cafodd y prosiect ffilm gymorth gan gymdeithas Sumo hyd yn oed ac roedd rhai chwaraewyr Sumo'n actio yn y ffilm gan gynnwys Koto-oushu (Telyn Ewrop) sydd wedi ymddeol yn ddiweddar. Mae'n ymddangos bod "Termae" yn mynd o nerth i nerth. (Trailer)